3EShHA - Philippians 1 : 27
 
معلش يا شباب إنهاردة مودى نشأت بيعتذر لظروف خاصة عن إنه يكتب التأمل فإستحملونى إنهاردة ويوم الخميس كمان .. زى ما قولنا إن الإسبوع ده هانتكلم عن المستقبل وإن الناس بتدور عن المجهول واللى مش عارفينه بطرق كتيرة فيه منها حاجات صح وفيه منها حاجات غلط علشان كده هنشوف إنهاردة هل الكتاب المقدس قايل حاجة عن الموضوع ده ولا لأ ؟
فى البداية حابب أقول إن العرافة نوع من الممارسات الشيطانية ، يعنى المتحكم فى الحاجات دى إبليس
موسى زمان فى الضربات العشرة على مصر كانوا السحرة بيعملوا نفس الحاجة علشان كده فرعون كان بيقسى قلبه ( خروج 7 ، 8 ) لكن طبعا إبليس ماقدرش يصمد كتير زى ما بنقرا فى خروج 8 : 19 " هذا إصبع الله " .. يعنى السحرة عرفوا إن الله هو اللى عمل كده مش قوة من موسى وهارون
 العرافة والفنجان والودع

بإختصار الساحر هو شخص سلم نفسه وإرادته لإبليس علشان يشتغل بيه قصاد مجموعة مميزات .. زى مثلا إنه بيخليه يعرف حاجات مخفيه وطبعا دى بتبقى حاجات فى الماضى لأن إبليس مايعرفش المستقبل لكن بيتوقعه بناء على ماضيك وشخصيتك ، لأن إبليس بيدرسنا ويذاكرنا


طيب هل الله ذكر العرافة بالتحديد والنجوم والفلك وحظك اليوم و الودع فى الكتاب المقدس ؟؟؟
الإجابة آه
أش 47 : 13-15 بيقول " قد ضعفت من كثرة مشوراتك.ليقف قاسمو السماء الراصدون النجوم المعرفون عند رؤوس الشهور ويخلصوك مما ياتي عليك. 14 ها انهم قد صاروا كالقش.احرقتهم النار.لا ينجون انفسهم من يد اللهيب.ليس هو جمرا للاستدفاء ولا نارا للجلوس تجاهها. " 
قاسمو السماء الراصدون النجوم المعرفون عند رؤوس الشهور = الناس اللى بيقولوا إن الأبراج دا علم فلك كبير وحقيقى .... للأسف يا جماعة الناس دول مجموعة كدابين وبيقولوا إنه علم


كمان وشوشة الودع الله كتب عنها فى الكتاب زى مثلا لما نقرا فى أش 8 : 19 " 19 واذا قالوا لكم اطلبوا الى اصحاب التوابع والعرافين المشقشقين والهامسين.الا يسال شعب الهه.ايسال الموتى لاجل الاحياء. 20 الى الشريعة والى الشهادة.ان لم يقولوا مثل هذا القول فليس لهم فجر. " 
المشقشين والهامسين = وشوشة الودع

يبقى الموضوع مش جديد ولا هو علم حديث ولا حاجة ولاهو حاجة خارقة للطبيعة لكن الله بيكشفلنا حيل إبليس علشان كده لما نقرا فى العهد الجديد "نحن لا نجهل أفكاره " لازم نبقى متأكدين إن الله فعلا بيكشف حيل كتير من حيل إبليس بس للأسف اللى يفتش عنها هو اللى بيقدر إنه يعرفها ويقاومها ويعيش منتصر

مش عايز أطول عليكم لكن اللى موجود فى الكتاب إن الحاجات دى من أعمال إبليس اللى بيعملها من خلال اولاده المخلصين اللى نفسهم يرضوه ويعملوا كده حتى لو كانت النتيجة إنهم يعيشوا فى تعاسة أبدية

لو نفسك تعرف حاجة اسال عنها اللى عارف كل حاجة وبلاش تعتمد على شوية تخاريف وأوهام

ياريت نرجع نقرا الشواهد المكتوبة فوق من الكتاب ونشوف تفاسيرها لأن دا مش كل الكلام اللى ممكن يتقال ونكمل مع بعض باقى الإسبوع علشان نعرف اكتر عن الموضوع ده ... ويارب يفتح عنينا على إبليس وعمايله اللى مخفية واللى ناس كتير ماشية وراها عن جهل

ربنا معاكم


 


Comments




Leave a Reply