3EShHA - Philippians 1 : 27
 
زي ماعرفنا ان الاسبوع ده هنتكلم عن الماضي و ازاي ممكن نعتمد عليه عشان نكون مستقبلنا

في البدايه الماضي ده في وقت من الاوقات كان حاضر وكنا بنعيشه و عن طريقه قدرنا نكون الحاضر اللي بنعيشه دلوقت واللي في المستقبل هيبقا اسمه ماضي …
يعني في اي حال من الاحوال الماضي ده هوا اساس الحاضر و المستقبل
والماضي والحاضر ممكن نستخدمهم في تكوين المستقبل اللي بنحلم بيه

يعني اكيد لازم نستفيد من الماضي

والماضي يعتبر اهم زمن فيهم لانه ممكن يستخدم صح ويستفيد منه صاحبه وممكن يستخدم غلط ويضيع صاحبه
بولس الرسول و نيلسون مانديلا
يعني انا ممكن اعتمد علي ماضيا في اني احوله من نجاح لفشل او من نجاح لنجاح او من فشل لفشل او من فشل لنجاح

كله في ايد الانسان فقد يستفيد من اخطائه في الماضي ليحاول تجنبها في المستقبل او ان يستمر في اخطائه الي ان تنتهي حياته في الصوره الخاطئه.

فمثلا في بلدنا الحبيبه مصر

لو سالنا اي مواطن اجنبي من خارج مصر وقلناله " ايه اللي تعرفه عن مصر او ايه اللي انتا شايفه مميز في مصر " اول حاجه هيقولها هيا
مصر يعني التلات اهرمات و ابو الهول وشويه الاثار اللي فيها ودي تقريبا مش اول حاجه هيقولها لا دي الحاجه الوحيده اللي هيقولها لان مافيش حاجه بتميز مصرنا الحبيبه غير الآثار اللي سابهالنا اجدادنا الله يكرمهم
وده بيرجع لاعتماد جميع الاجيال الماضيه علي هذا الواقع و انهم احفاد الفراعنه اللي كانوا ناجحين في كل حاجه لكن الواقع انهم اعتمدوا علي نجاح الفراعنه من غير مايتحركوا ويشتغلوا في حاضرهم وده اللي حول نجاح الفراعنه العظيم لفشل زريع من احفادهم.
اعتمدوا علي النجاح في الماضي منغير مايتحركوا او يشتغلوا وده حول النجاح في الماضي لفشل
وفي مجال الرياضه تقريبا لما دخلت مصر مسابقه تنظيم كاس العالم 2010 دخلت بملف الاهرامات وابو الهول عشان كده درجه مصر في المسابقه دي كانت صفر يعني ولا صوت ايد ملف مصر.

لكن في جنوب افريقيا اللي نظمت كاس العالم لكره القدم 2010
قصة كفاح بدات بانسان مأستسلمش لماضيه واعتمد عليه لتحقيق هدفه و تحرير بلده

◄نيلسون روليلالا مانديلا►

كان والده رئيساً لقبيلة التيمبو الشهيرة، وقد توفي ونيلسون لا يزال صغيراً، إلا انه انتخب مكان والده، وبدأ إعداده لتولي المنصب.

كانت جنوب أفريقيا في تلك الفترة خاضعة لحكم يقوم على التمييز العنصري الشامل بين البيض وهم الطبقه الحاكمه وبين السود وهم اصحاب الارض....بل أكثر من ذلك كان يحق لحكومة الأقلية البيضاء أن تجردهم من ممتلكاتهم أو أن تنقلهم من مقاطعة إلى أخرى،

وابتدا مانديلا حياته السياسيه في سنه 1942 لما انضم للمجلس الافريقي القومي الذي كان يدعو للدفاع عن حقوق الأغلبية السوداء في جنوب السنغال

و في الفتره دي اصبح مانديلا قائدا لحملات المعارضه و المقاومه في جنوب افريقيا

وفي عام 1964 حكم عليه مرة أخرى بتهمة التخطيط لعمل مسلح والخيانة العظمى فحكم عليه بالسجن مدى الحياة.

ووصلت مده سجنه ل 28 سنه ورغم كل ده مافقدش الامل ولا استسلم وكان مستمر في عمله السياسي و كان بيبعت رسايل للمجلس الافريقي اللي كان رئيس للجناح العسكري فيه عشان يواصلوا عملهم
واخيرا في سنه 1990 تم الافراج عنه و حصل علي جائزه نوبل للسلام سنه 1993

و تحقق هدفه في سنه 1994 لما بقي رئيس لجنوب افريقيا و تحول الحكم من يد الاقليه البيضاء الي يد اصحاب الارض

◄و في سنه 2010 نجحت جنوب افريقيا في تنظيم كاس العالم لكرة القدم و اتبنا استاد علي اسم نيلسون مانديلا►
بس
لو ركزنا في حياة مانديلا هنلاقي ان ماضيه كان مظلم و ماكانش حد يتوقع انه هيحرر جنوب افريقيا من حكم البيض
لكن مانديلا هوا الوحيد اللي كان مصر علي هدفه و ماضيه المظلم ده ماوقفهوش و استمر في النضال لغاية ما حقق هدفه وقدر يغير الصوره اللي كانت عليها جنوب افريقيا في الماضي للصوره اللي ماحدش كان يتوقعها في الماضي .
وهيا ان جنوب افريقيا اول بلد افريقيه تنظم بطولة كأس العالم لكرة القدم

◄◄وذي بولس الرسول اللي اعتمد عي دراسته وثقافته في الماضي و استغلهم في اضطهاد المسيحيين وكان فاكر انه كده بيخدم ربنا لكن بعد اما ربنا فتحله عنيه قدر يستخدم نفس الماضي ده لصالح ربنا و لخدمته و تحول من اكبر مضطهد للمسيحيه لاكبر رسول في المسيحيه

فلو كانت حياتي الروحيه ناجحه فقد اعتمد علي نجاحي فيها في الماضي و احولها من نجاح لفشل ذي كتير من الاشخاص اللي اصابهم الغرور وبعدوا عن ربنا ولو كانت حياتي الروحيه سيئه فقد اعتمد علي فشلي فيها في الماضي لتحويله الي نجاح .

وربنا هوا اللي بيحدد فيها اذا كنت ناجح ولا لا
فممكن تكون ذي شاول فاكر انك بتخدم ربنا وفاكر انك ناجح و تكتشف من ربنا انك مش ناجح .

في النهايه احب اقول حاجه اخيره ان كل واحد من حقه يعتمد علي ماضيه عشان يكون حياته وحتي لو كان ماضيه ده كله فشل و احزان الا انه يقدر يحول كل فشل وكل حزن لنجاح وفرح لو عرف طريق النجاح اللي يقصده ربنا

معلش طولت عليكم
ربنا معاكم

 


Comments




Leave a Reply