3EShHA - Philippians 1 : 27

جزء 2

02/07/2011

0 Comments

 
 ومكملين فى أول حاجة عملية عملها نحميا لما سمع بخراب أورشليم .. إحنا قولنا إنه صلى لكن صلاة نحميا دى لوحديها عايزة تأمل وكل ما تتأمل فيها تكتشف حاجات غريبة ... تكتشف إن الراجل دا ماكنش شخص حماسى بتاع صلاة لحدث أو صلاة علشان قالوا نصلى .... لكن كان بيصلى لأنه حاسس إن المشكلة دى مشكلته هو ، والقضية دى بتاعته ولازم هو اللى يترافع فيها
خلونا نتأمل فى الصلاة بتاعت نحميا
٥ وَقُلْتُ: «أَيُّهَا الرَّبُّ إِلهُ السَّمَاءِ، الإِلهُ الْعَظِيمُ الْمَخُوفُ، الْحَافِظُ الْعَهْدَ وَالرَّحْمَةَ لِمُحِبِّيهِ وَحَافِظِي وَصَايَاهُ.
نحميا إبتدى الصلاة بتسبيح لله وإنه يعظمه .... قد إيه إحنا كتير بننسى نعمل كده وبنبتدى الصلاة وكأنها لسته طلبات ( يارب عايزين وعايزين وعايزين ) وكأن الصلاة دى فقرة ما يطلبه المستمعون وكل واحد بيقول هو عايز إيه
أو فيه ناس بتفضل تقدم شكر وشكر وشكر علشان بعد كده تدخل على الطلبات
لكن الأجمل والأحلى واللى الله بيحبه أكتر هو إنى أقعد معاه لأنى عايزه هو مش عايز عطاياه مش قاعد معاه علشان مجرد أشكر على اللى هو بيعمله معايا كنوع من رد الجميل وخلاص
لكن الله مستنى ناس تعرف تسبحه وتعظمه وتديله قيمته فى حياتها

والعدد اللى بعده بيبدأ الصلاة لكن بيقول كلمة غريبة قوى
٦ لِتَكُنْ أُذْنُكَ مُصْغِيَةً وَعَيْنَاكَ مَفْتُوحَتَيْنِ لِتَسْمَعَ صَلاَةَ عَبْدِكَ الَّذِي يُصَلِّي إِلَيْكَ الآنَ نَهَارًا وَلَيْلاً لأَجْلِ بَنِي إِسْرَائِيلَ عَبِيدِكَ
الراجل دا بيبالغ ؟؟؟ ما أعتقدش .... لما الواحد بيبقى مشغول بحاجة قوى مش بيعرف يفكر فى غيرها ...ونحميا من كتر ما مشغول ومهموم بحكاية بلده كان بيصلى ( نهارا وليلا ) ... غريبة
غريبة إن فيه واحد كان بيصلى صبح وليل طول الوقت علشان سمع إن بلده خربانة ... غريبة إننا دلوقت مش بنقدر نكمل عشر دقايق نصلى
لو واحد عنده بيحبه قوى وفيه حاجات مشتركة بينهم هيلاقوا كلام يقولوه دايما .. لكن لو إتنين مايعرفوش بعض أكيد مش هيلاقوا حاجة يحكوا فيها أكتر من نص ساعة بالكتير
ياترى إنت قريب من ربنا ؟؟؟؟ قريب لدرجة تخليك متفاعل معاه وفيه حاجات مشتركة ينفع تقعد تحكى معاه فيها ؟؟؟؟ ....... فكر
أنا عارف إنى طولت وعلشان كده مش هنكمل باقى عدد 6 لكن هنكمله المرة اللى جاية .... وزى ما قولتلكم نحميا شخصية غريبة وصلاته الموجودة فى أصحاح 1 أغرب
يارب نكون بنستفيد منه ومن اللى عمله ويخلينا نتحفز إننا نكون (بنعيش) حياة مختلفة وغريبة على الناس ... لكن هى دى اللى الله عاوزها

 


Comments




Leave a Reply